KOLETA: TASNIA YA FILAMU IMETAWALIWA NA UCHAWI

Msanii wa filamu za Kibongo nchini, Coletha Raymond maarufu kama ‘Koleta’ amesema kuwa, tasnia hiyo ya filamu imetawaliwa na uchawi, huku akiongeza kuwa itakuwa ni vigumu kwa baadhi ya wasanii kung’ara katika kazi hiyo.

Koleta aliyasema hayo kupitia mtandao wa “Bongo Movie” ambapo amesema kuwa ni kwasababu uchawi hauna ushahidi hivyo si rahisi kutamka hadharani, lakini yeye anathubutu kusema ukweli kuhusu jambo hilo.

Aidha, Koleta alisema kwamba “Wengi wanaogopa kusutwa, lakini lisemwalo lipo na kama halipo laja, suala la uchawi katika tasnia ya filamu lipo wala watu wasikatae, unakuta msanii anajua kuigiza, lakini akipewa nafasi ya kufanya hivyo haonekani anafichwa,”

Mbali na hayo msanii huyo, alienda mbali zaidi baada ya kuthubutu kuwataja baadhi ya wasanii ( majina yamehifadhi) ambao hadi sasa wana uwezo mkubwa katika kuigiza, lakini hawatambi na hawana hamu ya kuigiza tena kutokana na kufanyiwa mchezo mchafu.

Sambamba na hayo Koleta aliongeza kuwa “Kwanza hawapewi nafasi pamoja na uwezo wao mkubwa, wanaopewa nafasi ni wale waliojiweka sawa,” huku akiwataka wasanii kuwa makini katika tasnia hiyo.